• slider33.jpg


'.eus' domeinura egin du salto Fundazioak

Jose Miguel de Barandiaran Fundazioak domeinu aldaketa egin du sarean eta hori horrela, '.com' izatetik '.eus' izatera igaro da. Aurrerantzean, www.barandiaranfundazioa.eus izango da interneteko helbide berria; E-mail hau spam roboten kontra babestuta dago. JavaScript aktibatuta izatea behar duzu hau ikusteko.  aldiz, helbide elektronikoa. Azken horri dagokionez, urtebeteko epean helbide zaharrean jasotzen diren mezuak berrian ere jasoko dira.

'.eus' domeinuarekin bat egitea urrats naturala izan da. Izan ere, bertan egoteko baldintzetako batzuk euskarazko webguneak edota euskal kulturarekin erlazioa dutenak izatea da, eta zalantzarik gabe, Jose Miguel de Barandiaran Fundazioak baldintza horiek betetzen ditu.

Lehendakariak harrera egin dio Jose Miguel de Barandiaran Fundazioari

 

Euskal Autonomia Erkidegoko lehendakari Iñigo Urkulluk harrera egin zien Jose Miguel de Barandiaran Fundazioko ordezkariei Gasteizko Lehendakaritzako bere bulegoan azaroaren 3an.

Jose Migel Barandiaranek berak 1988an sortutako Fundazioaren xehetasunak eman zitzaizkion Iñigo Urkullu lehendakariari bilkuran: Fundazioaren sorreraz, bilakaeraz, egungo egoeraz eta etorkizuneko proiektuez mintzatu ziren.

Lehendakariaz gain, Cristina Uriarte Eusko Jaurlaritzako Hezkuntza, Hizkuntza Politika eta Kulturako Sailburua egon zen bileran, eta baita Jose Miguel de Barandiaran Fundazioaren izenean, Josemari Velez de Mendizabal presidentea, Jose Manuel Bujanda Fundazioaren patronatuko Eusko Jaurlaritzaren ordezkaria, eta Zuriñe Velez de Mendizabal Fundazioko idazkari teknikoa ere.

Kolonbiatik Sara Etxera

 

Urriaren 15ean Kolonbiako Pereira herriko unibertsitateko José Miguel Ramirez Giraldo jauna Atauneraino bertaratu zen eta Jose Migel Barandiaranen bizileku izandako Sara Etxea bisitatu zuen.

"Arreta biziz eta txundituta ibili zen bisitaldian zehar, Jon Aizpurua Barandiaran eta Gabino Murua Zumalakarregi laguntzaile eta gidari zituela", adierazi du Jexux Aizpurua Barandiaran Jose Migel de Barandiaran Fundazioko kideak. 

Ramirez Giraldo irakaslea poliglota da: 15 hizkuntza dakizki (ingelesa, katalana, frantsesa, suediera, japoniera, hebreera...) eta horien artean kuttunena euskara duela aitortzen du. Gainera, bere gisara ikasi du hizkuntza. 

Informazioa: Jexux Aizpurua Barandiaran

Izendapen berriak Fundazioan

Jose Miguel de Barandiaran Fundazioko azken Patronatu bileran (urriak 15) askotariko gaiak landu zituzten Ataungo Sara Etxera bertaratutako kideek; aurrena baina, Josemari Velez de Mendizabal Fundazioko Presidenteak ongietorria egin zien 2015ean Patronatuan sartu berri diren patronoei. 

 

Bileran, besteen artean, Patronatuko idazkariaren kargu uztea eta berriaren izendapena eman zen; hori horrela, aurrerantzean Arantza Cuestak ordezkatuko du Susana Irigaray egiteko horretan. 

Ez zen baina, eguneko kargu-hartze bakarra izan. Hain zuzen ere, 2015eko hauteskundeen ondorioz Patronatua osatzen duten 10 kideetatik 5 berriztu dira, eta kide berriek ere onartu zuten euren izendatzea. Hauek dira kide berriak: Ana Herrera (Nafarroako Kultura Kontseilaria), Igone Martinez de Luna (Arabako Kulturako Foru Diputatua); Lorea Bilbao (Bizkaiko Kulturako Foru Diputatua), María José Telleria (Gipuzkoako Foru Aldundiko Kultura zuzendaria), Asier Rodriguez (Ataungo alkatea).

 

Mahaiaren bueltan eserita, besteak beste, honako gaiak landu zituzten urriaren 15ean bilerara bertaratutakoek: 2015eko jardueren berri eman zen; 2016ko behin-behineko aurrekontua onartu zuten; gai administratiboak landu ziren... 

 

Eta horrez gainera, 1921. urtean Jose Migel Barandiaranek berak sortutako Eusko Folklorearen Urtekaria ere izan zuten gai zerrendan patronoek. Hala, argitalpenaren etorkizunaren inguruan jardun zuten, eta Abel Ariznabarreta izendatu zuen Patronatuak EFUaren zuzendari berri. Sara Etxeraino gerturatu zen Ariznabarrareta bera, argitalpen aitzindariari eman nahiko liokeen norazkoaren berri emateko.

Urriko Patronatu bilera ordezkaritza zabalarekin

 

Urriaren 15ean egin zuen Jose Miguel de Barandiaran Fundazioko Patronatuak 2015eko bigarren bilera. Ataunen elkartu ziren, hain zuzen ere, Barandiaranen beraren etxean, Sara Etxean. 

Fundazioko Patronatua osatzen duten erakundeetako ordezkari hauek bertaratu ziren bilerara: Ana Herrera (Nafarroako Kultura Kontseilaria), Igone Martinez de Luna (Arabako Kulturako Foru Diputatua), Asier Rodriguez (Ataungo Alkatea), José Manuel Bujanda (Eusko Jaurlaritzako Hezkuntza, Hizkuntza Politika eta Kultura Saila Kabinetearen Zuzendaria), Gonzalo Olabarria (Bizkaiko Foru Aldundiko Kultura zuzendaria), Andoni Iturbe (Bizkaiko Kultura Ondarearen Zerbitzuko burua), Gabriela Vives (Gipuzkoako Foru Aldundiko teknikaria), Karmele Aierbe (Ataungo Kultura zinegotzia), Josemari Velez de Mendizabal (Eusko Ikaskuntza. Fundazioko Lehendakaria), Arantza Cuesta (Eusko Ikaskuntza. Fundazioko idazkaria), Susana Irigaray (Eusko Ikaskuntza), Jexux Aizpurua (Eusko Ikaskuntza), Zuriñe Velez de Mendizabal (Fundazioko idazkari teknikoa).

2015eko maiatzeko hauteskundeen ondorioz erakunde publikoetan emandako aldaketek Jose Miguel de Barandiaran Fundazioko Patronatuan ere eragina izan dute eta hamar patronotatik bost aldatu dira. Hala, lehendakariak bileraren hasieran ongietorria egin zien.