• slider33.jpg


Barandiaranen irudia GipuzkoAround proiektuan

Iñaki Goikoetxea, Javier Iribarren, Maria Rubio eta Iker Zaballa komunikazioan adituek GipuzkoAround proiektua ari dira garatzen; hau da, 4 edo 5 egunetan zehar Gipuzkoako 89 udalerrietatik igaro eta 4-5 minutu inguru iraungo dituen bideo bat grabatzen ari dira.

Uztailaren 25ean iritsi zen GipuzkoAround proiektuko lantaldea Ataunera eta Atauniker elkartearen ekimenez eta Jentilbaratza elkarteko kideen laguntzarekin herriko hainbat ikur azalduko dira bideoan: Jose Migel Barandiaran, mitologia eta Domoa. "Ataungo Dorronsoro baserriaren atarian, atzeko aldean Ataungo Domoa duela egin zuten grabazioa", aipatu du Atauniker elkarteko eta Jose Miguel de Barandiaran Fundazioko kide Jexux Aizpuruak. 

Urte amaieran egingo dute GipuzkoAround proiektuaren emaitzaren zabalkundea.

Sara Etxea bisitatzen, uztailean

Uztailaren 12an bisita egin zuten Sara Etxera EHUko Psikologia Katedradun Patricia Insuak eta haren alaba Camilak, Jon Aizpurua eta Joxemari Galparsoro ataundarrak lagun zituztela.

"Patriciak bazuen lehendik ere Barandiaranen handitasunaren berri, bere ikasketetan irakasle izan zuelako Joxe Martin Apalategi antropologo ataundarra", aipatu du Aizpuruak. 

 

Abian da Barandiaran Beka 2016 deialdia

Barandiaran Beka 2016 deialdia ireki berri du Jose Miguel de Barandiaran Fundazioak. Etnologia alorreko ikerketak izango dira edizio berriko ardatz eta interesatuek 2016ko urriaren 31 baino lehen aurkeztu beharko dute euren proposamena.

Bekaren zuzkidurari dagokionez, 10.000 eurokoa izango da eta norbanakoek zein lantaldeek hartu ahal izango dute parte deialdian. Horiek, Euskal Herrian zein kanpoan bizi direnak izan daitezke, euskal kulturaren alor horietan lan egiten badute.

Fundazioak 2016ko abenduaren 31 baino lehen emango du epaiaren berri; halere, epaimahaiak beka esleitu gabe utz dezake, irizpideen arabera aurkezturiko proiektuek ez badituzte baldintzak betetzen.

Bekaren aurrekariak

Beka 1980an sortu zenetik  Euskal Herriko Historiaurre-Arkeologia eta Antropologia-Etnografiarekin zerikusia duten lanak bultzatzea izan da xede nagusia eta emaitza oso onak lortu dira. Euskal Herriko ikertzailerik esanguratsuenek hartu dute parte orain arte Barandiaran Bekaren ikerketa taldeetan.

Barandiaran Beka ikerketarako bi alderdietan Euskal Herrian erakarpen gehien duena dela esan daiteke eta horrek, ondorioz, bermatu egiten du Bekaren kalitatea.

Barandiaran Bekaren oinarriak, hemen

 

Anuario Eusko Folklore aldizkariaren 50. zenbakia

Jose Miguel de Barandiaran Fundazioak argitaratzen duen Anuario Eusko Folklore aldizkaria bere 50. zenbakira iritsi da. Arabako Foru Aldundiaren laguntzarekin kaleratu berri den argitalpenak Labayru ikastegiko Ander Manterola eta Gurutzi Arregi  izan ditu zuzendari koordinatzaile, hurrenez hurren. 

Etniker Euskalerria taldeen lanekin osatu den 50. zenbaki honetan askotariko gaiak landu dituzte egileek. Horietariko batzuk dira: Estudio etnográfico de Obanos (Navarra). Agricultura (Mª Amor Beguiristain);  Refranes y creencias de Sara (Lapurdi) recogidas por Augustin Etcheberry (1853-1900) (Jabier Kalzakorta); Olivos y aceitunas, trujales y aceite: El cultivo del olivo y la elaboración del aceite en Rioja Alavesa (José Angel Chasco Oyón); edota Ahotza, forgeron en Labourd (Iparralde) (Michel Duvert).

2014an zendutako bi etnografo ezaguni eskainitako artikulu bana ere jasotzen da 50. zenbaki honetan: In Memoriam. Antxon Aguirre Sorondo (1946-2014) eta Arabako Etnografia Mintegiaren Por quién lloran las campanas, azken hau Patxo Fernandez de Jauregiri eskainia.

Sorreratik gaur arteko indizeak

Nabarmentzekoa da 1921ean Jose Migel Barandiaranek sortutako aldizkari zientifikoan argitaratu diren artikulu eta egile guztien indizea jasotzen duen artikulua egin dutela zenbaki honetarako Ander Manterolak eta Gurutzi Arregik. 

Noranzko berria

Jose Miguel de Barandiaran Fundazioak Anuario Eusko Folklore agerkariari noranzko berria eman nahi izan dio eta zuzendaritza berritu du; hala, aurrerantzean, Abel Ariznabarretaren esku egongo da  egiteko hori. “Freskotasuna eman nahiko genioke agerkariari, orain arte landu diren gaiek tokia izango dute, baina berritasunak ere aurreikusten ditugu”, azaldu du Ariznabarretak.  

Barandiaranek sortutako aldizkaria koordinatuko duen batzorde zientifikoa osatzen eta 51. zenbakia prestatzen dihardu dagoeneko zuzendari berriak.

Luis Barandiaran Irizarrekin hizketan

2016ko martxoaren 15ean Jose Miguel de Barandiaran Fundazioko ordezkariek bisita egin zioten Luis Barandiaran Irizar idazle eta Jose Migel Barandiaranen lobari bera bizi den Gasteizko Joaquín Goicoecheaundia apaiz-egoitzan.

Besteak beste, bere osabaren inguruko pasarteak ekarri zituen gogora gipuzkoarrak eta Fundazioko lehendakari Josemari Velez de Mendizabalek,  ataundarraren inguruko hainbat gogoeta konpartitu zituen Luisekin. Amaitzeko, Fundazioak argitaratu berri duen Abenduaren 31 Jose Migel Barandiaranen bizitzan. Bere egunerokoetan idatziak (1924-1988) liburuxka jaso zuen anfitrioiak Zuriñe Velez de Mendizabal idazkari teknikoaren eskutik. 

1921ko urriaren 2an Soraluzen jaio zen Luis Irizar Barandiaranek hainbat liburu idatzi ditu bere bizitzan zehar, tartean, 1976an argitaratutako José Miguel de Barandiarán, patriarca de la cultura vasca biografia edo 1985ean eginiko Breve Antología de Fábulas, Cuentos y Leyendas.