• slider33.jpg


"Europa, Barandiaran eta baloreak" liburua, argitara

Jose Miguel de Barandiaran Fundazioak "Europa, Barandiaran eta baloreak" liburua argitaratu du, Jose Miguel Barandiaranen heriotzaren 25. urteurrenaren harira.

Lanak bi zati ditu: batetik, 2016ko abenduaren 21ean (heriotzaren urteurrenean), Ataungo Sara etxean egin zen ekitaldi instituzionalean hitza hartu zutenen hitzaldiak biltzen ditu: Jose Miguel de Barandiaran Fundazioko presidente Josemari Velez de Mendizabalena Ataungo alkate Asier Rodriguezena, Argitxu Camus historialariarena, Nafarroako presidente Uxue Barkosena eta Euskal Autonomia Erkidegoko lehendakari Iñigo Urkullurena, hurrenez hurren. 

Bestetik, 2016ko udazkenean Euskal Herriko hiriburu nagusietan antolatu ziren mahai-inguru zikloko solasaldiak biltzen ditu: Asier Barandiaran, Ixone Fernandez de Labastida, Argitxu Camus, Xabier Irujo eta Gaspar Martínezen hitzaldiak, hain zuzen ere.

Eskuratu hemen libura PDF formatuan. Paperean nahi izanez gero, soilik bidalketa gastuak ordaindu beharko dituzu liburua jasotzean (9 €). Sakatu hemen eskaera bideratu ahal izateko.     

 

Eusko Jaurlaritzaren Kultura eta Hizkuntza Politikako sailburuak Jose Miguel de Barandiaran Fundazioko bulegoak bisitatu ditu

Bi erakundeen arteko lankidetzan aurrera eginez, Eusko Jaurlaritzaren Kultura eta Hizkuntza Politikako sailburu Bingen Zupiria, Barandiaran Fundazioko presidente Josemari Velez de Mendizabalekin elkartu zen Fundazioaren Gasteizko bulego nagusian. Bilerarekin hasi aurretik, sailburuak instalakuntzak ezagutzeko aukera izan zuen, baita Eusko Ikaskuntzaren bulegoa ere.

 

Hitzorduan, Velez de Mendizabalek Fundazioaren nondik norakoen berri eman zizkion Zupiriari, eta aurrera begira bi erakundeen artean elkarlanean jarraitzeko pausuak finkatu zituzten. Besteak beste, Barandiaran Bekaren 2017ko prozesua ireki zuten, Kultura eta Hizkuntza Politikako Sailaren diru-laguntzari esker.

 

 

 

2017ko aurrekontuak onartu ditu Jose Miguel de Barandiaran Fundazioak

Arabako Foru Aldundiko Jauregian egin du Patronatuak 2017ko lehenengo bilera, martxoaren 23an hain zuzen ere. Saioa hasi aurretik, Arabako Ahaldun nagusi Ramiro Gonzalezek patronatu kideak agurtu zituen. Bilkuran, besteak beste, 2017ko aurrekontuei argi berdea eman zitzaien. 

Urteko lehenengo hitzorduan segidako lagunek parte hartu zuten: Bingen Zupiria, Eusko Jaurlaritzako Kultura eta Hizkuntza Politika sailburua; Igone Martinez de Luna, Arabako Kultura foru diputatua; Fernando Perez, Nafarroako Kultura zuzendaria; Marijose Telleria, Gipuzkoako Kultura zuzendaria; Asier Rodriguez,Ataungo alkatea; Karmele Aierbe, Ataungo Kultura zinegotzia; Josemari Velez de Mendizabal, Fundazioko presidentea, Arantza Cuesta, idazkaria, Susana Irigarai eta Jexux Aizpurua. Fundazioko idazkari tekniko Zuriñe Velez de Mendizabalek ere bileran parte hartu zuen.

 

Ataungo Joxemiel Barandiaran ikastetxeko LHko ikasleek Sara etxea bisitatu dute

Ataungo Joxemiel Barandiaran ikastetxeko LHko azken urteko ikasleekin, urtero bezalaxe, herri-bisita gidatua egin zen otsailaren 21ean. Hasi Goikoetxe/Gomensoro baserrien inguruko Artadia argibide-oholetik, Sara etxean sartu, Peruenezarre, Urezandi, Zubiondo, Olaluzeagako karobi-zuloa, Naza, Ataungo Domoa argibide-ohola Andreseneko zubian eta Migel Imazen aipamena, plaza (kanala, historia, hilobiak, armarria…), udaletxeko ezkaratzean erloju-makina zaharra, Joxemielen eskulturak…) eta elizan (pontea, hilobiak, artxiboak, alkate-makilaren kokagunea, armarriak eta organoa). Jexux  Aizpurua izan zen gidari. Antolatzailea: Atauniker kultur elkartea. Laguntzailea: Jose Miguel de Barandiaran Fundazioa.

Arabar Errioxan kokatutako proiektu batentzat 2016ko Barandiaran Beka

Barandiaran Ikerketa Bekaren 2016ko deialdiak badauka proiektu irabazlea: “Ardoaren sare-e(t)nologia Arabar Errioxan: Materialtasuna, Agentzia eta Ondarea” izeneko lanari esleitu dio epaimahaiak saria. Ikerketa lantaldea Josu Ozaita Azpirozek eta Edurne Urrestarazu Garciak osatzen dute.

Epaimahaia 2016ko abenduaren 26an elkartu zen eta deialdira aurkeztutako 11 lanak aztertu ondoren hartu zuen erabakia. Eta ez da nolanahiko erabakia izan epaimahaiarentzat bere esanetan,"maila altua egon baita Barandiaran Bekaren edizio honetara aurkeztutako proiektuen artean".

Hainbat irizpidek eraman dute Arabar Errioxan kokatutako lana irabazle izatera. Batetik, aiaren egokitasuna dago, "Etnologiaren parametroetara eta ondarearen ideiara egokitzen da bete betean. Gainera, proposatutako ikerketa eremua antropologikoki gutxi ikertu den tokia da (Arabar Errioxa)".

Bestetik, proiektuaren ikuspuntua hartu dute ardatz: "Oso ondo zaindutako proiektua aurkeztu da, arina, ikuspuntu pertsonal batekin, baina izaera zientifikoa galdu gabe". Eta azkenik, hizkuntza: "euskarazko proiektua da".

Orain, urtebeteko tartea izango du lantaldeak lana aurrera eramateko.

Edizio mamitsua

2011tik deialdirik egin gabe egon ostean, 2016an berriz ere berreskuratu zen Barandiaran Ikerketa Beka, eta oso mamitsua izan da. "Batetik, eta aipatu bezala, maila altua egon da aurkeztutako proiektuetan. Bestetik, gai aniztasuna ere egon da eta horrek oraindik ikertzeke dauden eremu ugari uzten ditu agerian".

Ikertzaileen profila ere anitza izan dela azpimarratu behar da, hala, ibilbide luzea duten ikertzaileek zein hasiberriek euren interesa erakutsi dute. Azkenik, epaimahaiak euskarazko proiektu ugari aurkeztu direla ekarri du gogora, 11tik bost, hain zuzen ere.