• slider33.jpg


1921eko 'Altzaniako zortzi trikuharriren esplorazioa' txostena berriz ere kalean

Jose Miguel de Barandiaran, Telesforo Aranzadi eta Enrique Eguren izan ziren Exploración de ocho dólmenes de Antzania liburu-txostenaren egileak. 1921ean argitaratu zen, aurreko urteko udan Goierriko mendietan eginiko lanen emaitzak jasoz eta berrargitaralpena egin dute.

Prentsaurrekoa web

Urriaren 3an Koldo Mitxelena Kulturunean, Donostian, egin dute liburuaren aurkezpena. Prentsaurrekoan  María José Telleria Gipuzkoako Kultura Zuzendari Nagusiak, Ioritz Imaz Idiazabalgo alkateak, Antonio Berasategi historialari idiazabaldarrak eta Zuriñe Velez de Mendizabal Jose Miguel de Barandiaran Fundazioko idazkari teknikoak hitz egin dute.

Bertan aipatu dutenez, berrargitalpenaren ideia Idiazabalgo Kirol Elkarteko Mendi Sailetik iritsi zitzaion Udalari, honek ideia ona zela iritzi eta Gipuzkoako Foru Aldundira jo zuen laguntza eske. Jatorrizko lanaz gainera, euskarara ere itzuli dute 'Los tres trogloditas tristes' bezala ere ezagutu izan zuten hirukotearen lana.

Fundazioko idazkari teknikoak prentsaurrekoan azaldu duen bezala, "Jose Miguel Barandiaranentzat oso garrantzitsua zen atzera begira ipini eta nondik gatozen jakitea, aurrera begiratu eta nora goazen ikusteko. Hala, 97 urteren ostean txosten hau gaurko belaunaldiei eskaini ahal izatea horretarako ariketa polita da".

 

Barandiaranen arrastoa, 'Ahotsak eta itzalak' eleberrian

Maixa Zugasti idazle tolosarrak idatzitako Ahotsak eta itzalak eleberriak argia ikusi zuen 2018ko martxoan. Egileak berak Jose Miguel de Barandiaran Fundazioari adierazitakoaren arabera, "istorio hori gauzatzeko, J.M.Barandiaranek erbestean bildu zituen txostenak erabili ditut".

liburua2 1

Hala, erbestean kokatutako fikzioa kaleratu du gipuzkoarrak, eta "eleberrian, eta On Jose Migueli, omenaldi txiki bat egin nahi izan diot pertsonaia baten bidez, Aita Basarte".

'Txelemon' antzezlanaren esanahiaren atzetik

Ataunen XIX. mendera bitartean Txelemon -Zelemon izenez ere ezaguna- izeneko antzezlan bat antzezteko ohitura egon zen On Jose Miguel de Barandiaranek jaso zuen bezala. Epaiketa baten antzezpena zen, hain zuzen ere, lapurreta egitea leporatzen dioten gizon baten epai eta kondenan oinarritutako obra da.

Berriki, abuztuaren 5ean, Felix Gerenabarrena Filosofian Doktoreak Txelemon-Hermes, Ataunen izeneko artikulua kaleratu zuen El Correo egunkarian. "Joxe Miel Barandiaranek Ataunen XIX. mendera arte antzezten zen komedia deskribatu zuen, baina drama horren esanahi zehatza argitu gabe zegoen", aipatu du egileak. Artikuluarekin Txelemonen esanahia argitzen saiatzen da Gerenabarrena.

Artikulua irarkurri

Ottawatik Sara Etxea bisitatzera

Ataungo Jentilbaratza Kultur Elkartearen eskutik abuztuaren hasieran Sara Etxea bisitatzeko aukera izan zuen Ottawan, Canadan, bizi den Idoia Arana Beobide antropologoak. Euskal mitologiagatik interesatua, eta aipaturiko elkarteak egiten duen lanaz jabetuta bertaratu zen Gipuzkoako herrira. Jose Miguel de Barandiaranen etxea izan zena bisitatzeko "ilusioa" zuela-eta, Jentilbaratza elkarteko kideekin batera bisita egiteko aprobetxatu zuen.


SaraEtxea Ottawa

 

Urrestarazu eta Ozaita: "Barandiaran Bekari esker sare zabal batekin egin dugu topo Arabar Errioxan"

Edurne Urrestarazu Garciak eta Josu Ozaita Azpirozek 2016ko Barandiaran Ikerketa Beka eskuratu zuten, hain zuzen ere, Arabar Errioxan kokatutako proposamen bati esker. Mahats bilketan ibili dira, elkarrizketak egin dituzte aditu zein herritarrekin... Ardoaren kulturan murgildu dira. Eta dagoeneko entregatu dute azken lana - Arabako Errioxako Enokultura Sarea- eta orain epaimahaikideek irakurtzeko ordua iritsi da. Bien bitartean, bi antropologo ikerlari gazteekin hitz egin dugu.

Arabako Errioxa aldean ibili zarete Barandiaran Bekaren bidez ikerketa egiten.
Nahiz eta aurretik bagenekien ardoz bustitako eskualde bat topatuko genuela, Barandiaran Bekari esker aurrera eramandako ikerketaren bidez, sare zabal batekin egin dugu topo. Eta sare hori enokultura da,  ardoaren eragin handia duen kultura. Identitatea agertu da, festak, generoa, denominazioa, upategiak…  Hori guztihori  azaleratu nahi izan dugu lan honetan, dena dagoelako elkarlotuta. Ezin izan gara gauza bakarrean zentratu, osotasunean hartu dugu.

 IMG-20180702-WA0006

Ozaita eta Urrestarazu, azken lana eskuetan dutela.

Ikerketa baten hasiera da?
Alor bakoitzak beste ikerketa bat egiteko aukera ematen du, bai. Bazegoen aurretik nolabaiteko ikerketa eginda, baina historia landuz, edo enologia alorretik, esaterako.  Antropologo bezala oso polita izan da nahiz eta gertu dagoen eskualde bat izan berezitasun ugariko tokia topatzea. Oso markatutako lekua da, muga geografikoak Toloño eta Ebro daukate, horrek identitatean eragiten die, sarri ez direlako ez euskaldun ez errioxar sentitzen…

Zer izan da zuentzat Barandiaran Beka eskuratzea?
Elkarrekin egin genuen Antropologia, eta ondoren master bat egin dugu bakoitzak, eta oro  har Barandiara Bekak ikasitako guzti hori praktikan ipintzeko aukera eman digu. Pila bat ikasi dugu, ikerketa bat hasieratik amaierara eramaten, titulu bat edukitzetik benetan antropologo sentitzera. Guretzat esperientzia ederra eta bultzada bat izan da.

Gainera Arabar Errioxako eskualdea bizi-bizi dago, aldaketak sumatzen dira, mugimenduan dago, eta momentu onean harrapatu dugu. Arabako Mahastiak izendapena sortzeko urratsak ematen dabiltza eta horren testigu ere izan gara; oso polita izan da gertutik bizi ahal izatea.