Jose Miguel Barandiaran marrazki bizidun bilakatuta
Jose Miguel de Barandiaran Fundazioak HEZIMUBIrekin batera garatu du ‘1,2,3… Barandiaran’ egitasmoa. Bost bideo laburrez osatuta dago proiektua eta ataundarraren bizitzako hainbat gorabehera kontatzen dira bertan. Azaroaren 5ean aurkezpena eginda, asmoa hilean behin bideo berri bat sareratzea izango da.
Marrazki bizidun forman datorkigu Barandiaran oraingoan. Gaztaroan hasita - antropologia eta etnografiarako bere zaletasuna azaleratu zenean- erbestera arteko kontakizuna egiten da ekoiztutako bideoetan zehar.
Fundazioak argi dauka: modu erakargarri eta freskoan Euskal Herrian zein atzerrian erreferente izan zen gipuzkoarraren irudia gaur egunera ekartzea funtsezkoa da haren izena eta izana mantentzeko. “HEZIMUBItik lan ederra egin dute, Barandiaranen bizitzako hainbat momentu modu erraz batean ezagutzeko aukera ematen dute bideo hauek. Proiekturako propio sortutako irudi zein musikak eta Jon Aizpurua kazetariaren lokuzioak harrapatu egiten du ikuslea hasieratik”.
Sara Etxean elkartu ziren 2018ko bigarren bilerarako Fundazioko patronoak
Jose Miguel de Barandiaran Fundazioak urteko bilera egin zuen 2018ko urriaren 25ean Ataunen, Sara Etxean. Mahaiaren bueltan eseri ziren honako patrono kideak: Dori López (Nafarroako Kultura Zuzendaria), María José Telleria (Gipuzkoako Kultura Zuzendaria), Joseba K. Perez de Heredia (Arabako Kultura Zuzendaria), Asier Rodriguez (Ataungo Alkatea), Imanol Agote (Eusko Jaurlaritzako Kultura Ondarearen Garapenerako aholkulari), Josemari Velez de Mendizabal (Fundazioko presidentea), Arantza Cuesta (Fundazioko idazkaria), Susana Irigaray eta Jexux Aizpurua. Bileran parte hartu zuten baita ere Abel Ariznabarretak (Eusko Folklore Urtekariaren zuzendaria) eta Zuriñe Velez de Mendizabalek (Fundazioko idazkari teknikoa).
Sara Etxeko atarian bilera ostean.
Askotariko gaiak izan zituzten mahai-gainean bertaratutakoek. Besteen artean 2019ko aurrekontuak onartu zituzten behin-behinean, 2018 urtearen proiekzio ekonomikoa ere egin zuten, eta Barandiaran Beka zein Eusko Folklore Urtekaria -biak Jose Miguel de Barandiaran Fundazioaren zutabe- izan zituzten hizpide.
2018 urtea martxa onean doala aipatu zuen Fundazioko presidenteak bere txostenean, erakundeekin dagoen harreman ona azpimarratu zen, eta etorkizunerako hainbat proiekturen berri eman zuen.
Etnologia ardatz izango du oraingoan Barandiaran Bekak
Jose Miguel de Barandiaran Fundazioak beste behin ere ipini du martxan Barandiaran Ikerketa Beka. 2018ko urriaren 26an hasi eta azaroaren 30 bitartean Etnologia alorreko proiektuak aurkezteko epea izango dute interesatuek.
Epaimahaiak urtea amaitu aurretik emango du ebazpenaren berri -abenduaren 31 azken eguna izanik- eta behin beka onartuta, 2019an garatu beharko da proiektu saritua (ez da luzapenik onartuko). Halare, epaimahaiak esleitu gabe utz dezake beka, ikusiko balu aurkeztutako proposamenek behar adinako baldintzak eta bermeak eskaintzen ez dituztela iritzi badiote.
Barandiaran Ikerketa Bekak 10.000 euroko zuzkidura izango du ohi bezala. Aurten, Fundazioak dei berezia egin nahi die ikertzaile berri gazteei euren proposamenak bidal ditzaten. Horrez gain, "soilik argitaratu gabeko lanak eta izaera propioa dutenak finantzatu ahal izango dira, eta ez neurri handiagoko beste proiekturen baten zati direnak, ezta aurretik bestelako finantziazioren bat dutenak ere".
'Euskal identitatea(k)' hizpide, Eusko Folklore Urtekariaren 52. zenbakian
Jose Miguel de Barandiaran Fundazioak Eusko Folklore Urtekariaren 52. zenbakia kaleratu berri du, oraingo honetan, Euskal identitatea(k) gaia ardatz nagusia duelarik.
Abel Ariznabarreta Zubero agerkariko zuzendariak adierazi duenez,"definizio sozial oro bezala, etengabe berritzen, berrasmatzen eta eraikitzen ari den kontzeptua da identitatearena. Identitateak konplexuak dira eta euskal identitatea ere etengabe aldatzen ari da, garai historikoak eta testuingurua aldatzen diren heinean". Hori horrela, "interesgarria da alor kulturalaren eta identitarioaren aspektu ezberdinak aztertzea, etorkizuneko gizartea nolakoa izatea nahi dugun ikertzen saiatzeko". Bost lan jaso dira guztira, gain nagusiaren inguruan.
Bestalde,eta ekarpenei dagokienez, bi lan jasotzen dira liburuaren bigarren zatian. Batetik, 2016ko Barandiaran Bekaren irabazleen azken lanaren laburpena bat, eta Nafarroako Bardeetan kokatutako eta erlegintza ardatz duen ikerketa bestea. Zenbaki berriko hirugarren eta azken atala aitortza bat da, Pilar Barandiaranen heriotzaren X. urteurrenaren harira egin nahi izan zaiona, hain zuzen.
52. zenbakiko gaiak
Euskal identitatea(k)
Euskal identitatea, identitate ikerketen eta politiken argitara. Eduardo Apodaka Ostaikoetxea
Euskal etnoidentitatearen birsortzea: pop musikaren ahalmenak. Josu Larrinaga Arza
Hainbeste ahalegindu behar naiz euskalduna izateko? Euskal(dun)tasuna(k) aztertzen. Ion Andoni del Amo Castro
Hari eta Herri: Luzaiden etnografia (digitala) eginez, euskal territorioa ingurune digitalean marrazten. Koldo Diaz Bizkarguenaga
Painting the Basque American Diaspora. Zoe Bray Dacosta
Ekarpenak
Arabako Errioxako sarea: hurbilpen e(t)nologikoa. Josu Ozaita Azpiroz ; Edurne Urrestarazu García
La apicultura tradicional en las Bardenas Reales de Navarra. Mª Rosario Mateo Pérez; Pablo Orduna Portús
Aitortzak
Pilar Barandiaranen emaria. Jexux Aizpurua Barandiaran
1921eko 'Altzaniako zortzi trikuharriren esplorazioa' txostena berriz ere kalean
Jose Miguel de Barandiaran, Telesforo Aranzadi eta Enrique Eguren izan ziren Exploración de ocho dólmenes de Antzania liburu-txostenaren egileak. 1921ean argitaratu zen, aurreko urteko udan Goierriko mendietan eginiko lanen emaitzak jasoz eta berrargitaralpena egin dute.
Urriaren 3an Koldo Mitxelena Kulturunean, Donostian, egin dute liburuaren aurkezpena. Prentsaurrekoan María José Telleria Gipuzkoako Kultura Zuzendari Nagusiak, Ioritz Imaz Idiazabalgo alkateak, Antonio Berasategi historialari idiazabaldarrak eta Zuriñe Velez de Mendizabal Jose Miguel de Barandiaran Fundazioko idazkari teknikoak hitz egin dute.
Bertan aipatu dutenez, berrargitalpenaren ideia Idiazabalgo Kirol Elkarteko Mendi Sailetik iritsi zitzaion Udalari, honek ideia ona zela iritzi eta Gipuzkoako Foru Aldundira jo zuen laguntza eske. Jatorrizko lanaz gainera, euskarara ere itzuli dute 'Los tres trogloditas tristes' bezala ere ezagutu izan zuten hirukotearen lana.
Fundazioko idazkari teknikoak prentsaurrekoan azaldu duen bezala, "Jose Miguel Barandiaranentzat oso garrantzitsua zen atzera begira ipini eta nondik gatozen jakitea, aurrera begiratu eta nora goazen ikusteko. Hala, 97 urteren ostean txosten hau gaurko belaunaldiei eskaini ahal izatea horretarako ariketa polita da".